పెరుగుతున్న ఎండలు, వడగాల్పుల ముప్పు
రాగల పదిహేను రోజుల్లో దేశవ్యాప్తంగా, ముఖ్యంగా తెలుగు రాష్ట్రాల్లో ఎండల తీవ్రత మరింత పెరిగే అవకాశం ఉందని భారత వాతావరణ శాఖ (IMD) హెచ్చరించింది. ఉష్ణోగ్రతలు సాధారణం కంటే 2 నుండి 4 డిగ్రీలు అధికంగా నమోదయ్యే అవకాశం ఉందని వివరించింది. తెలంగాణ, రాయలసీమ మరియు కోస్తా ఆంధ్రలోని పలు ప్రాంతాల్లో గరిష్ట ఉష్ణోగ్రతలు 40° సెల్సియస్ నుంచి 44° సెల్సియస్ వరకు చేరే అవకాశం ఉందని వాతావరణశాఖ తెలిపింది. సముద్ర తీర ప్రాంతాలలో ఉష్ణోగ్రత ఇలాగే ఉన్నప్పటికీ అసలు తీవ్రత ఎక్కువగా ఉండొచ్చు. ఏప్రిల్ 20 తర్వాత మధ్య భారతం మరియు దక్షిణ భారతదేశంలోని కొన్ని జిల్లాల్లో ‘హీట్ వేవ్’ (వడగాల్పులు) వీచే ప్రమాదం ఉందని వాతావరణ నిపుణులు అంచనా వేస్తున్నారు.
కోస్తా తీర ప్రాంతాల్లో గాలిలో తేమ శాతం ఎక్కువగా ఉండటం వల్ల వేడితో పాటు ఉక్కపోత తీవ్రంగా ఉంటుంది.సోషల్ మీడియాలో ప్రచారమవుతున్న 55 డిగ్రీల ఉష్ణోగ్రత వార్తలను వాతావరణ శాఖ కొట్టిపారేసింది. అటువంటి అత్యధిక ఉష్ణోగ్రతలు నమోదయ్యే అవకాశం లేదని, ప్రజలు తప్పుడు వార్తలను నమ్మి భయపడవద్దని స్పష్టం చేసింది. ఏదైనా సమాచారం కోసం ప్రభుత్వం విడుదల చేసే హెచ్చరికలనే ప్రామాణికంగా తీసుకోవాలని సూచించింది.
ఎండల దృష్ట్యా ప్రజలు కొన్ని జాగ్రత్తలు పాటించాలని ఆరోగ్య శాఖ కోరుతోంది రానున్న రెండు వారాలు వాతావరణం పొడిగా ఉండి, ఎండ తీవ్రత ఎక్కువగా ఉంటుంది కాబట్టి అప్రమత్తంగా ఉండటం అవసరమని అధికారులు వెల్లడించారు.
ఫేక్ వార్తల పట్ల అప్రమత్తంగా ఉండండి
ఏప్రిల్ 19 నుండి మే 31 వరకు ఉష్ణోగ్రతలు 45°C – 55°C వరకు పెరుగుతాయని భారత వాతావరణ శాఖ (IMD) గానీ, ఇతర ప్రభుత్వ సంస్థలు గానీ ఎటువంటి హెచ్చరికలు జారీ చేయలేదు. తప్పుదోవ పట్టించే సమాచారం ప్రచారంలో ఉందని దీనిని విశ్వశించవద్దని ప్రజలను కోరింది సివిల్ ప్రొటెక్షన్ డిపార్ట్మెంట్ (Civil Protection Department) పేరిట వచ్చే వార్తలు గతంలో కూడా పలుమార్లు వైరల్ అయ్యాయి. కేరళ స్టేట్ డిజాస్టర్ మేనేజ్మెంట్ అథారిటీ (KSDMA) వంటి ప్రభుత్వ సంస్థలు ఇప్పటికే ఇవి తప్పుడు వార్తలని స్పష్టం చేశాయి. ప్రస్తుతం ఎండలు ఎక్కువగా ఉన్నప్పటికీ, 55°C వంటి అత్యధిక ఉష్ణోగ్రతల గురించి వస్తున్న వార్తలు కేవలం ప్రజలను భయభ్రాంతులకు గురిచేయడానికి సృష్టించినవేనని వాతావరణ నిపుణులు స్పష్టం చేస్తున్నారు.
