అధికారిక ఎంట్రీగా మరాఠీ థ్రిల్లర్..
సంతోష్ దావఖర్ రచన, దర్శకత్వంలో తెరకెక్కిన మరాఠీ థ్రిల్లర్ ‘గోంధల్’ 2027 ఆస్కార్ అవార్డుల్లో బెస్ట్ ఇంటర్నేషనల్ ఫీచర్ ఫిల్మ్ విభాగానికి భారతదేశం తరఫున అధికారిక ఎంట్రీగా ఎంపికైంది. ఈ విషయాన్ని ఫిల్మ్ ఫెడరేషన్ ఆఫ్ ఇండియా (FFI) ప్రకటించింది.
33 చిత్రాల నుంచి ‘గోంధల్’ ఎంపిక
ఈసారి భారతదేశం తరఫున ఆస్కార్ పరిశీలనకు మొత్తం 33 చిత్రాలు సమర్పించబడ్డాయి. వాటిలో హిందీ చిత్రాలు 14, మరాఠీ, తెలుగు, గుజరాతీ భాషల్లో నాలుగేసి చిత్రాలు, తమిళంలో మూడు చిత్రాలు ఉండగా, మలయాళం, నాగమీస్ తదితర భాషల చిత్రాలు కూడా పోటీలో ఉన్నాయి. ఈ చిత్రాలను పరిశీలించిన ప్రత్యేక జ్యూరీ చివరకు ‘గోంధల్’ను ఎంపిక చేసింది. ఇది కేవలం ఒక మరాఠీ చిత్రానికి దక్కిన గుర్తింపు మాత్రమే కాదు. భారతీయ ప్రాంతీయ కథలు, స్థానిక సంస్కృతులు, జానపద కళలు కూడా అంతర్జాతీయ సినీ వేదికపై ప్రాతినిధ్యం వహించగలవన్న విషయాన్ని మరోసారి ముందుకు తెచ్చిన సందర్భం.
‘గోంధల్’ అంటే ఏమిటి?
‘గోంధల్’ కథకు కేంద్రబిందువు మహారాష్ట్రలోని సంప్రదాయ గోంధల్ జానపద ఆచారం. సంగీతం, నృత్యం, కథనం, ఆధ్యాత్మిక సంప్రదాయాలు కలిసిన ఈ రాత్రంతా జరిగే జానపద ప్రదర్శన మహారాష్ట్ర సంస్కృతిలో ప్రత్యేక స్థానాన్ని కలిగి ఉంది.
అయితే సినిమా కేవలం ఒక ఆచారాన్ని తెరపై చూపించే ప్రయత్నంతో ఆగిపోదు. గ్రామీణ మహారాష్ట్ర నేపథ్యంలో సంప్రదాయాలు, వ్యక్తిగత ఆకాంక్షలు, మానవ బలహీనతలు ఎలా పరస్పరం ఢీకొంటాయన్న అంశాలను థ్రిల్లర్ శైలిలో ఆవిష్కరిస్తుంది ‘గోంధల్’లో జానపద సంస్కృతి ఒక నేపథ్యం మాత్రమే కాదు… కథను నడిపించే కీలక శక్తిగా కనిపిస్తుంది. సంతోష్ దావఖర్కు అంతర్జాతీయ గుర్తింపు రావడం ఇదే తొలిసారి కాదు. ఆయన ‘గోంధల్’ చిత్రానికి 2025లో జరిగిన 56వ ఇంటర్నేషనల్ ఫిల్మ్ ఫెస్టివల్ ఆఫ్ ఇండియా (IFFI)లో సిల్వర్ పీకాక్–బెస్ట్ డైరెక్టర్ అవార్డు అందుకున్నారు. అంతేకాకుండా బెంగళూరు, పుణే తదితర అంతర్జాతీయ చలన చిత్రోత్సవాల్లోనూ గుర్తింపు పొందింది. దీంతో ఆస్కార్ ఎంట్రీ ఎంపిక ఒక్కసారిగా వచ్చిన పరిణామం కాదని, ఇప్పటికే ఫిల్మ్ ఫెస్టివల్ వేదికలపై తనదైన ముద్ర వేసుకున్న చిత్రంగా ‘గోంధల్’ను చూడవచ్చు. 2026 ఆస్కార్ కోసం భారతదేశం నుంచి నీరజ్ ఘైవాన్ దర్శకత్వం వహించిన ‘హోమ్బౌండ్’ అధికారిక ఎంట్రీగా ఎంపికైంది. ఇషాన్ ఖట్టర్, విశాల్ జేత్వా ప్రధాన పాత్రల్లో నటించిన ఈ చిత్రం ఆస్కార్ తుది నామినేషన్ దశకు చేరుకోలేకపోయింది. ఇప్పుడు ‘గోంధల్’ భారతదేశం తరఫున అంతర్జాతీయ ఫీచర్ ఫిల్మ్ విభాగంలో పోటీకి వెళ్తోంది. మరాఠీ సినిమాకు ఇది నాలుగో అవకాశం ‘గోంధల్’తో కలిపి ఆస్కార్కు భారత అధికారిక ఎంట్రీగా ఎంపికైన మరాఠీ చిత్రాల సంఖ్య నాలుగుకు చేరింది. గతంలో ‘Shwaas’, ‘Harishchandrachi Factory’, ‘Court’ చిత్రాలు ఈ గౌరవాన్ని పొందాయి. ఇది మరాఠీ సినిమా పరిణామంలో ఒక ముఖ్యమైన మైలురాయిగా నిలుస్తోంది. 2027 ఆస్కార్ షార్ట్లిస్ట్ ప్రకటన డిసెంబర్ 15, 2026న, తుది నామినేషన్ల ప్రకటన జనవరి 21, 2027న జరగనుంది. 99వ అకాడమీ అవార్డుల ప్రదానోత్సవం 2027 మార్చి 14న లాస్ ఏంజెల్స్లోని డాల్బీ థియేటర్లో జరగనుంది.
