ఖైరతాబాద్ ఎమ్మెల్యే దానం నాగేందర్పై తెలంగాణ హైకోర్టు అనర్హత వేటు వేయడం, ఒక ఎమ్మెల్యే తన పదవిని కోల్పోవడం మాత్రమే కాదు. తెలంగాణలో గత కొంతకాలంగా కొనసాగుతున్న పార్టీ ఫిరాయింపుల రాజకీయానికి ఇదో కొత్త మలుపు. స్పీకర్ నిర్ణయాన్ని పక్కనపెట్టి, దానం అనర్హుడని ప్రకటించడంతో ఖాళీ అయిన సీటు ఇప్పుడు మూడు ప్రధాన రాజకీయ పార్టీలకు అగ్ని పరీక్షగా మారనుంది
దానం మళ్లీ పోటీ చేస్తారా అన్న ఆసక్తికర చర్చ ప్రారంభం కాకముందే ప్రజాక్షేత్రంలోనే తేల్చుకుంటానని సుప్రీంకోర్టు కి వెళ్లే ఆలోచన లేదని స్పష్టం చేసేసేశారు.
అయితే కాంగ్రెస్ సీటు ఆయనకే ఇస్తుందా..? ఆయన అనర్హతతో ఏర్పడిన ఖాళీని ఆ పార్టీ ఎలా ఎదుర్కోబోతుంది అన్నదే ఇప్పుడు ఓ ముఖ్యమైన అంశం. అభ్యర్థి ఎంపికే కాంగ్రెస్ రాజకీయ వ్యూహానికి ఒక సంకేతంగా మారే అవకాశం ఉంది.
దానం నాగేందర్ 2023లో గెలిచింది బారాస టికెట్పైనే. ఇప్పుడు అదే సీటులో ఉపఎన్నిక రావడంతో ఆ పార్టీ కి కూడా కత్తి మీద సాము గా మారింది. అయితే 2024 లోక్సభ ఎన్నికల్లో ఖైరతాబాద్ ప్రాంతం ఉన్న సికింద్రాబాద్ లోక్సభ నియోజకవర్గంలో BJP కూడా బలమైన ఓటింగ్ సాధించిన విషయం ఇక్కడ గమనించాల్సిన ముఖ్య విషయం. గత అసెంబ్లీ ఎన్నికల్లో ఖైరతాబాద్లో బీఆర్ఏస్ కు 43.48%, కాంగ్రెస్కు 29.28%, బీజేపీ కి 24.59% ఓట్లు వచ్చిన విషయం తెలిసిందే. నిజానికి ఈ కేసులో బీజేపీ ఎమ్మెల్యే ఏలేటి మహేశ్వర్రెడ్డి కూడా పిటిషనర్గా ఉన్నారు. బీఆరెస్ ఎమ్మెల్యే పాడి కౌశిక్రెడ్డి కూడా అనర్హత పిటిషన్పై న్యాయపోరాటం చేశారు. హైకోర్టు వారి పిటిషన్లను అనుమతించి స్పీకర్ నిర్ణయాన్ని పక్కనపెట్టింది. అందువల్ల ఉపఎన్నికలో బీజేపీ కూడా ఫిరాయింపుల అంశాన్ని రాజకీయ ప్రచారంగా ఎలా మలుస్తుందన్నది ఆసక్తికరంగా మారుతుంది. దానం నాగేందర్ రాజకీయ ప్రస్థానంలో ఎదురైన మరో ఉపఎన్నిక విషయాన్ని ఇక్కడ ప్రస్తావించుకోవాల్సిన అవసరం ఉంది. 2004లో టీడీపీ నుంచి గెలిచి, అనంతరం రాజీనామా చేసి కాంగ్రెస్లో చేరి కాంగ్రెస్ అభ్యర్థిగా ఉపఎన్నికలో పోటీ చేసిన దానం నాగేందర్ ఎంఐఎం అభ్యర్థి చేతిలో ఓడిపోయారు. ఒకప్పుడు టీడీపీ నుంచి గెలుపు… రాజీనామా… కాంగ్రెస్ నుంచి ఉపఎన్నికలో ఓటమి… ఇప్పుడు BRS నుంచి గెలుపు… కాంగ్రెస్లో చేరిక… అనర్హత… మళ్లీ ఉపఎన్నిక!
తెలంగాణ రాజకీయాల్లో దానం నాగేందర్ రాజకీయ ప్రయాణాన్ని పరిశీలిస్తే, పార్టీ మార్పులు, రాజీనామాలు, ఉపఎన్నికలు ఆయన రాజకీయ జీవితంలో కొత్త విషయం కాదనే విషయం కనిపిస్తుంది. అదే దానం ఖైరతాబాద్ రాజకీయాల్లో మరోసారి బలమైన స్థానం సంపాదించారు. తరువాత 2009లో కాంగ్రెస్ తరఫున ఖైరతాబాద్ నుంచి గెలిచి ఉమ్మడి ఆంధ్రప్రదేశ్లో మంత్రిగా పనిచేశారు. 2014లో కాంగ్రెస్ అభ్యర్థిగా పోటీ చేసి ఓడిపోయారు. అనంతరం TRSలో చేరి 2018లో ఖైరతాబాద్ నుంచి విజయం సాధించారు.
BRS నుంచి కాంగ్రెస్లోకి వెళ్లిన దానం నాగేందర్, ఎమ్మెల్యే గా ఉంటూనే సికింద్రాబాద్ నుంచి గత లోక్సభ ఎన్నికల్లో కాంగ్రెస్ అభ్యర్థిగా పోటీ చేసి BJP అభ్యర్థి జి. కిషన్రెడ్డి చేతిలో ఓడిపోయారు. మళ్ళీ ఈ ఉప ఎన్నిక తో 2004 నాటి రాజకీయం చర్చలోకి వస్తోంది. అయితే ఈ రెండు సందర్భాలను ఒకేలా చూడలేం. 2004లో జరిగినది ఒక రాజకీయ పరిణామం కాగా, ప్రస్తుత పరిస్థితి రాజ్యాంగంలోని ఫిరాయింపుల నిబంధనలపై జరిగిన న్యాయపోరాటం తర్వాత వచ్చింది. తెలంగాణ హైకోర్టు తాజాగా దానం నాగేందర్ను అనర్హుడిగా ప్రకటించి, స్పీకర్ నిర్ణయాన్ని పక్కనపెట్టింది. 2023లో 28,402 ఓట్ల మెజారిటీతో గెలిచిన దానం రాజకీయ ప్రయాణానికి ఇప్పుడు మరో పరీక్ష కానుంది. ఉప ఎన్నిక కు నేను రెడీ అని స్టేట్మెంట్ ఇచ్చేసినా దానంకు అసలు సమాధానం మాత్రం ఎన్నికల బరిలోకి వచ్చే అభ్యర్థులు, ప్రచార అంశాలు, స్థానిక రాజకీయ సమీకరణాలు, ఓటర్ల మనోగతం తో రానుంది.