వైజాగ్ స్టీల్ ప్లాంట్ ఇప్పుడు అన్ని పార్టీలకు రాజకీయ ముడి సరుకుగా మారింది. ఎన్నో ప్రధాన సమస్యలు ఏపీ లో ఉన్నా వాటన్నిటిని పక్కదోవ పట్టించేందుకు స్టీల్ ప్లాంట్ ప్రయివేటీకరణ అంశాన్ని తెరపైకి తీసుకొచ్చారు. ఇదే పరిస్థితి కొనసాగితే వచ్చే ఎన్నికలలో ఈ స్టీల్ ప్లాంట్ అంశమే ప్రధాన అజెండాగా రాజకీయ పార్టీలు బరిలోకి దిగే అవకాశాలు కనిపిస్తున్నాయి. ఇదిలా ఉండగా స్టీల్ ప్లాంట్ పై కేంద్రం ఇప్పుడు కొత్త వ్యూహం మొదలుపెట్టినట్లు సమాచారం. అప్పుడప్పుడు వివాదాస్పద ప్రకటనలు చేయడం, తర్వాత వాటిని సరిదిద్దుకొవడం సర్వసాధారణంగా మారిన కేంద్రం వైజాగ్ స్టీల్ ని టాటా కి అప్పగించే యోచన లో ఉన్నట్లు తెలుస్తుంది. ప్రైవేటు రంగంలో 70 వేల కోట్ల నష్టంలో నడుస్తున్న అతిపెద్ద స్టీల్ ప్లాంట్‌గా ఉన్న టాటా ప్లాంట్ విశాఖ ఉక్కు పరిశ్రమను ఎలా టేకప్ చేయాలనుకుంటోందననే ప్రశ్న కూడా చాలామందిలో ఉదయించినా కరోన సమయంలోను ఇతర పరిస్థితులోను ప్రజలకు అండగా నిలిచిన టాటా సంస్థలపై ప్రజలకు ఉన్న సాఫ్ట్ కార్నర్ను అస్త్రం గా మలచుకోవాలన్నది కేంద్రం కొత్త ఎత్తుగడ. భారతదేశంలో ఎన్నో స్టీల్ ప్లాంట్ లు ఉండగా విశాఖ స్టీల్ ను మాత్రమే ప్రైవేటుపరం ఎందుకు చేయాలి అనేది ఇప్పుడు చర్చగా మారింది. దీనికి కూడా కారణం ఉంది. మూడు లక్షల కోట్ల ఆస్తులు.. సులువుగా వాణిజ్యం, రవాణా, చేసుకోవడానికి పోర్టులు. రైల్వే, విమానయాన అవకాశాలు.. క్వాలిటీ తో ఉత్పత్తి చేస్తున్న ఐరన్ కు మంచి డిమాండ్ ఇలాంటి కారణాల దృష్ట్యా కొన్ని కార్పొరేట్ సంస్థలు కేంద్ర ప్రభుత్వంపై ఒత్తిడి తెచ్చి ప్రైవేటుపరం చేయడానికి ఒప్పించిందనేది ప్రచారం సాగుతుంది. 2001 లోనే టాటా సంస్థ విశాఖ స్టీల్ ప్లాంట్ ను చేజిక్కించుకోవడానికి ప్రయత్నాలు మొదలుపెట్టింది. ప్రభుత్వ పెద్దలతో సంప్రదింపులు కూడా జరిపింది. అయితే మధ్యలో రాజకీయ నేతల జోక్యం ఎక్కువవడంతో గుజరాత్ వ్యాపారస్తులు సీన్ లోకి వచ్చారు. కేంద్ర బిజెపి ప్రభుత్వం వారికే అప్పచెప్పే అవకాశాలు ఎక్కువగా ఉన్నట్లు ప్రచారం కూడా జరిగింది. ఏమైందో తెలియదు కానీ సీన్లోకి మరొక ఇద్దరు ముగ్గురు వచ్చి చేరారు. మరోపక్క ఇక్కడ స్టీల్ ప్లాంట్ సంరక్షణ కోసం యూనియన్ల పోరాటం కొనసాగుతూనే ఉంది. దేశీయ ఉక్కు దిగ్గజంగా పేరున్న టాటా స్టీల్ వైజాగ్ స్టీల్ ను దక్కించుకునేందుకు సిద్దమవ్వడమే ఇప్పుడు హాట్ టాఫిక్ గా మారిన అంశమైంది. సంస్థ చీఫ్ ఎగ్జిక్యూటివ్ ఆఫీస‌ర్, మేనేజింగ్‌ డైరెక్టర్‌ టి.వి. నరేంద్రన్‌ ఈ విషయాన్ని రెండేళ్ల క్రితమే ధ్రువీకరించారు. అయితే విశాఖ ఉక్కుపై టాటా ఇంత మక్కువకు పలు కారణాలు ఉన్నాయా అంటే ఉన్నాయని చెప్పక తప్పదు. తూర్పు తీర ప్రాంతంలో ఉన్న వైజాగ్ స్టీల్‌ను టాటా దక్కించుకోగలిగితే ఆగ్నేయాసియా మార్కెట్లలో వ్యాపారం మరింత సులువు కానుండగా, దేశీయ మార్కెట్లోనూ రైలు, రోడ్డు మార్గాల్లో ప్రత్యేక ఉక్కు ఉత్పత్తులను సరఫరా చేసేందుకు అవకాశం లభించనుంది. 22 వేల ఎకరాల భూములున్న విశాఖ స్టీల్ ప్లాంట్‌కు స్వల్ప దూరంలోనే గంగవరం పోర్టు ఉండటం మరో అనుకూల అంశం. కాగా తద్వారా బొగ్గు తదితర ముడిసరుకుల దిగుమతి, స్టీల్ ఉత్పత్తుల ఎగుమతి మరింత సులభమవుతుంది. కోల్ కతా కేంద్రంగా వ్యాపారాన్ని సాగిస్తున్న టాటా స్టీల్ కు దక్షణాదిలో విశాఖ లాంటి ప్లాంట్ దక్కితే అది సంస్థకు తిరుగులేని వ్యాపార అవకాశంగా భావిస్తుంది.