ప్రపంచ దేశాల కంటిమీద కునుకు లేకుండా చేస్తున్న ‘ఎల్ నినో’ మళ్లీ వార్తల్లోకి వచ్చింది. పసిఫిక్ మహాసముద్రంలో సంభవిస్తున్న మార్పుల వల్ల రానున్న కాలంలో ప్రపంచవ్యాప్తంగా వాతావరణ సమతుల్యత దెబ్బతినే అవకాశం ఉందని శాస్త్రవేత్తలు హెచ్చరిస్తున్నారు. ప్రకృతి ఇచ్చే ఈ హెచ్చరికను గమనించి ప్రభుత్వం, ప్రజలు అప్రమత్తంగా ఉండాల్సిన సమయం ఆసన్నమైంది.
‘ఎల్ నినో’ ఎఫెక్ట్ మే నెల సమీపిస్తున్న కొద్దీ ఈ పరిస్థితి మరింత తీవ్రమవుతుందని వాతావరణ నిపుణులు అంటున్నారు
ఏమిటి ఈ ‘ఎల్ నినో’?
స్పానిష్ భాషలో ‘ఎల్ నినో’ అంటే ‘చిన్న పిల్లవాడు’ అని అర్థం. వాతావరణ శాస్త్ర పరిభాషలో చెప్పాలంటే.. పసిఫిక్ మహాసముద్రం యొక్క ఉపరితల నీరు సాధారణం కంటే ఎక్కువ వేడెక్కడాన్ని ‘ఎల్ నినో’ అంటారు. సాధారణంగా తూర్పు నుంచి పడమర వైపు వీచే గాలులు బలహీనపడటం వల్ల, సముద్రంలోని వెచ్చని నీరు దక్షిణ అమెరికా తీరం వైపు మళ్లుతుంది. ఈ మార్పు వల్ల గాలిలోని తేమ, పీడనాల్లో తేడాలు వచ్చి అంతర్జాతీయంగా వాతావరణం అస్తవ్యస్తమవుతుంది.
భారతదేశం వంటి వ్యవసాయ ఆధారిత దేశాలకు ఎల్ నినో ఒక గండం లాంటిది. మన దేశానికి వచ్చే ‘నైరుతి రుతుపవనాల’పై ఇది తీవ్ర ప్రతికూల ప్రభావాన్ని చూపుతుంది. ఎల్ నినో ప్రభావం ఉన్న ఏళ్లలో సాధారణం కంటే తక్కువ వర్షాలు కురుస్తాయి. వర్షాలు తగ్గడంతో పాటు ఎండల తీవ్రత విపరీతంగా పెరిగి, ఎల్ నినో వల్ల ప్రపంచం వింత పరిస్థితిని ఎదుర్కొంటుంది. ఒకవైపు ఆస్ట్రేలియా, ఇండోనేషియా, భారత్ వంటి దేశాల్లో తీవ్రమైన కరువు, అడవుల్లో కార్చిచ్చు సంభవిస్తే.. మరోవైపు దక్షిణ అమెరికాలోని పెరూ, ఈక్వెడార్ వంటి దేశాల్లో భారీ వర్షాలు, వరదలు ముంచెత్తుతాయి. వాతావరణ మార్పుల (Climate Change) కారణంగా ఎల్ నినో తీవ్రత గత దశాబ్ద కాలంలో మరింత పెరిగింది. దీనిని మనం ఆపలేము కానీ, ముందస్తు ప్రణాళికలతో నష్టాన్ని తగ్గించవచ్చు” అని వాతావరణ నిపుణులు అభిప్రాయపడుతున్నారు.
ఏం చేయాలి…
నీటి నిల్వలను సమర్థవంతంగా నిర్వహించడం.
తక్కువ నీటితో పండే పంటలను ప్రోత్సహించడం.
విపత్తు నిర్వహణ బృందాలను అప్రమత్తం చేయడం. వంటివి చేపట్టాలని సూచిస్తున్నారు. అలాగే వ్యక్తి గతం గా కూడా కొన్ని జాగ్రత్తలు తీసుకోవాలని సూచిస్తున్నారు. దాహం వేసే వరకు వేచి చూడకుండా మీరు ప్రతి గంటకు నీరు త్రాగాలని చెప్తున్నారు దగ్గర ఒక వాటర్ బాటిల్ ఉంచుకోవడం మంచిదంటున్నారు. ఉదయం 11 గంటల నుండి మధ్యాహ్నం 3 గంటల వరకు అత్యంత ప్రమాదకరమైన సమయమని ఈ సమయంలో, సూర్యరశ్మి నేరుగా శరీరంపై పడటం వలన ఎల్నినో ఎఫెక్ట్ మరింత ఎక్కువుంటుందంటున్నారు.
నల్లటి వస్త్రాలు వేడిని ఎక్కువగా గ్రహిస్తాయని దాని వలన అవి వేసుకోకపోవడమే ఉత్తమం అంటున్నారు. చిన్న చిన్న జాగ్రత్తలు తీసుకుంటే ఎల్నినో ప్రభావాన్ని తగ్గించుకోవచ్చని నిపుణులు చెపుతున్నారు.