స్ట్రీమింగ్ కు పెద్ద ఓటీటీలు ఎందుకు వెనకడుగు వేసాయి…?
గతేడాది అక్టోబర్ లో విడుదలైన ది తాజ్ స్టోరీ The taj story చాలా ఆలస్యంగా ఇప్పుడు ఓటీటీ(ott) ప్రేక్షకుల ముందుకు వచ్చింది థియేటర్లలో ఓ మోస్తరు విజయాన్ని అందుకున్న ఈ చిత్రం విడుదలకు ముందే ఎన్నో వివాదాలను మూటకట్టుకుంది. తాజ్ మహల్ నుంచి శివుని విగ్రహం బయటకు వస్తున్నట్టు ప్రమోషన్స్ కోసం డిజైన్ చేసిన పోస్టర్ సినిమా పై మంచి బజ్ క్రియేట్ చేయడం అటుంచితే చిత్రాన్ని బ్యాన్ చేయాలని ఓ వర్గం గట్టిగా డిమాండ్ చేసింది. ఇప్పడు ఐదు నెలల తరువాత ది తాజ్ స్టోరీ మూవీ లయన్స్ గేట్ ప్లే లో స్ట్రీమింగ్ అవుతుంది. నిజానికి ‘ది తాజ్ స్టోరీ’ మేకర్స్ మొదట్లో తెలుగు, తమిళ భాషల్లో కూడా విడుదల చేస్తామని గట్టిగానే ప్రచారం చేశారు. కానీ ఓటీటీకి వచ్చేసరికి కేవలం హిందీకే పరిమితం చేయడం అనేది సగటు తెలుగు ప్రేక్షకుడికి నిరాశ కలిగించింది. యూట్యూబ్ లో తెలుగులో విడుదల చేసిన కొన్ని సీన్స్ అత్యంత నాసిరకమైన డబ్బింగ్ తో ఈ చూడాలన్న ఇంట్రస్ట్ కిల్ చేసేలా ఉండటం విచారకరం. సినిమా అంటే కేవలం వినోదం మాత్రమే కాదు, కొన్నిసార్లు అది సమాజంలో చర్చనీయాంశమైన అంశాలకు వెలుగునిచ్చే ప్రయత్నం కూడా. బాలీవుడ్ లో గత కొన్ని సంవత్సరాల నుంచి వాస్తవ సంఘటనల ఆధారంగా రూపొందుతున్న సినిమాల ట్రెండ్ నడుస్తోంది. అయితే, ఈ సినిమాలకు థియేటర్లలో ఎంత ఆదరణ లభిస్తున్నప్పటికి డిజిటల్ ప్లాట్ఫారమ్ (OTT) లోకి వచ్చేసరికి అనేక అడ్డంకులు ఎదురవుతున్నాయి. దీనికి తాజా ఉదాహరణే ‘ది తాజ్ స్టోరీ’ (The Taj Story).
పెద్ద ఓటీటీల మౌనం.. కారణమేంటి?
సాధారణంగా ఏదైనా చిన్న సినిమా హిట్ అయినా, నెట్ఫ్లిక్స్ లేదా అమెజాన్ ప్రైమ్ హాట్ స్టార్ వంటి దిగ్గజ సంస్థలు ఆ హక్కుల కోసం పోటీ పడతాయి. కానీ, ‘ది తాజ్ స్టోరీ’ విషయంలో సీన్ రివర్స్ అయింది. తాజ్ మహల్ మూలాల గురించి చర్చించిన ఈ సినిమాను ప్రముఖ ఓటీటీలు ఏవీ పట్టించుకోలేదు. ది తాజ్ స్టోరీ’ సినిమా విషయానికి వస్తే తాజ్ మహల్ మూలాల గురించి, అది ఒకప్పుడు హిందూ దేవాలయం (తేజో మహాలయ) అనే వివాదాస్పద సిద్ధాంతం చుట్టూ తిరుగుతుంది. షాజహాన్ దీన్ని ఆక్రమించి సమాధిగా మార్చాడని సుప్రసిద్ధ చరిత్రకారుడు పీఎన్ ఓక్ ఒక వివాదాస్పద విషయాన్ని వెల్లడించారు. 4వ శతాబ్దంలో రాజా పరమార్థి దేవ్ ఈ శివాలయం నిర్మించారని తాజ్ మహల్ ని ఒక హిందూ దేవాలయం అని నిరూపించేందుకు విష్ణు దాస్ అనే టూరిస్టు గైడ్ చేసిన పోరాటమే ది తాజ్ స్టోరీ. తుషార్ అమ్రిష్ గోయెల్ ఈ సినిమాను తెరకెక్కించగా… పరేశ్ రావల్ లీడ్ రోల్ చేశాడు.
నెట్ఫ్లిక్స్, అమెజాన్ వంటి అంతర్జాతీయ సంస్థలు. రాజకీయ , మతపరమైన సున్నిత అంశాలు ఉన్న సినిమాలను స్ట్రీమ్ చేస్తే చట్టపరమైన ఇబ్బందులతో తమ బ్రాండ్ ఇమేజ్ దెబ్బతింటుందని భావిస్తాయి. ఈ అంశంలో చరిత్రను , వివాదాస్పద అంశాల సినిమాలను పక్కన పెట్టడం వల్ల సృజనాత్మకత దెబ్బతినే ప్రమాదం ఉందన్నది కొంతమంది మేధావుల మాట. ‘ది కేరళ స్టోరీ’, ‘ది కాశ్మీర్ ఫైల్స్’ వంటి సినిమాలకు కూడా ఓటీటీ విషయంలో కొన్ని ఇబ్బందులు తప్పలేదు. థియేటర్లకు సెన్సార్ బోర్డు ఉన్నట్లే, ఓటీటీలకు కూడా ప్రభుత్వం కొన్ని నిబంధనలు తీసుకొచ్చింది. ఈ వివాదాల్లో తలదూర్చడం కంటే, సురక్షితమైన కమర్షియల్ సినిమాల వైపు మొగ్గు చూపితే గ్లోబల్ గా ఎవరికి ఇబ్బంది ఉండదన్న భావనకు దాదాపు ఓటీటీ లు వచ్చాయి. నెట్ఫ్లిక్స్, అమెజాన్ వంటి గ్లోబల్ ఓటీటీ సంస్థలు వివాదాస్పద రాజకీయ లేదా మతపరమైన అంశాలు ఉన్న సినిమాలను కొనుగోలు చేయడానికి ఈ మధ్య కాలంలో చాలా జాగ్రత్త పడుతున్నాయి. ఏదైనా వివాదం తలెత్తితే తమ ప్లాట్ఫారమ్పై నెగటివ్ ఇంపాక్ట్ పడటమే కాకుండా చట్టపరమైన ఇబ్బందులు వస్తాయని భావించడమే కారణమంటున్నారు ఎట్టకేలకు ఈ వివాదాస్పద చిత్రంలయన్స్ గేట్ ప్లే (Lionsgate Play) లో విడుదలైంది. నిజానికి ఇది కూడా అంతర్జాతీయ సంస్థే అయినప్పటికీ, భారతదేశంలో నెట్ఫ్లిక్స్, ప్రైమ్ స్థాయి పాపులారిటీ దీనికి లేదు. ఒక సినిమా నెట్ఫ్లిక్స్ లోగాని అమెజాన్ ప్రైమ్ లో గాని వస్తే దానికి ఉండే బజ్ వేరు. కానీ, తక్కువ మంది సబ్స్క్రైబర్లు ఉన్న యాప్లో రావడం వల్ల సినిమాలోని సందేశం మెజారిటీ ప్రజలకు చేరకపోవడం ఒకటైతే చూడాలి అనుకున్న ప్రేక్షకుడు పైరసీ ని ఆశ్రయించి ప్రమాదం ఉంది. పెద్ద సంస్థలు రిజెక్ట్ చేసినప్పుడు లేదా తక్కువ ధర కోట్ చేసినప్పుడు, మేకర్స్ తమ పెట్టుబడిని కాపాడుకోవడానికి ఉన్న ఆప్షన్లలో లయన్స్ గేట్ వంటి ప్లాట్ఫారమ్స్ ను ఎంచుకుంటున్నారు. కొన్ని ఓటీటీ లు తమ ఉనికిని చాటుకోవడానికి ఇలాంటి వివాదాస్పద సినిమాలను ఎంచుకుంటాయి. పెద్ద ఓటీటీ సంస్థలు సినిమాలను కొనేటప్పుడు కేవలం కథనే కాకుండా, మేకింగ్ క్వాలిటీ, స్టార్ కాస్టింగ్ మరియు థియేట్రికల్ రన్ను కూడా పరిగణనలోకి తీసుకుంటాయి. ఈ సినిమా బాక్సాఫీస్ వద్ద ఆశించిన స్థాయిలో పెద్ద విజయాన్ని అందుకోకపోవడం వల్ల కూడా నెట్ఫ్లిక్స్, అమెజాన్ వంటి సంస్థలు ఆసక్తి చూపకపోవడానికి ఒక కారణం అయుండొచ్చని సినీ విశ్లేషకులు భావిస్తున్నారు. సినిమా కంటెంట్ బాగున్నా, కేవలం ప్లాట్ఫారమ్ పాపులారిటీ లేకపోవడం వల్ల ‘ది తాజ్ స్టోరీ’ వంటి సినిమాలు మరుగున పడిపోతున్నాయి. వివాదాస్పద సినిమాలు ఓటీటీలో రాకపోవడం సెన్సార్షిప్ అనుకోవాలా? లేక వ్యాపార వ్యూహమా? అన్నది ప్రేక్షకులే అర్ధం చేసుకోవాలి. కేవలం కమర్షియల్ లెక్కలే కాకుండా, వాస్తవాలను ఆవిష్కరించే సినిమాలకు పెద్ద ప్లాట్ఫారమ్స్ అండగా నిలిచినప్పుడే ఓటీటీ రంగం మరింత పారదర్శకంగా మారుతుంది.