తెలుగు మీడియా లో కొత్త రాజకీయం..?

పాత్రకేయుల మధ్య కొన్ని చానల్స్ మధ్య ఒక ఇంట్రెస్టింగ్ అప్డేట్ విపరీతంగా సర్క్యులేట్ అవుతుంది. తెలుగు మీడియా చరిత్రలోనే ఇది అత్యంత కీలకమైన పరిణామమని వ్యాఖ్యానిస్తూ పోస్టులు పెట్టడం ఆ బ్రేకింగ్ న్యూస్ ఇంపార్టెన్స్ ని స్పష్టం చేస్తోంది. జాతీయ స్థాయిలో గుర్తింపు పొంది, రెండు తెలుగు రాష్ట్రాల్లో వార్తా ప్రపంచాన్ని శాసించిన టీవీ9 యాజమాన్య, సంపాదకీయ పీఠంపైనే ఆ తీవ్రమైన చర్చ. తాజాగా యంగ్ జర్నలిస్ట్ అనిల్ ఇనగంటి(సీనియర్ పాత్రికేయులు ఇనగంటి వెంకట్రావు కుమారుడు) కు సంస్థలో కీలక బాధ్యతలు అప్పగించడం ద్వారా టీవీ9 రాజకీయ దిశ మారిపోనుందనే విశ్లేషణలు ఇప్పుడు బలంగా వినిపిస్తున్నాయి.
రవిప్రకాష్ విప్లవం నుండి రజనీకాంత్ సమతుల్యత వరకు
ఈటీవీ వంటి సాంప్రదాయ ఛానళ్ల కాలంలో సంచలనాల నమోదు తో తెలుగు మీడియా రంగంలో ఒక విప్లవాన్ని తీసుకొచ్చిన ఘనత టీవీ9 ది. కానీ, సీని రాజు నుంచి మెగా కృష్ణారెడ్డి, మై హోమ్ రామేశ్వర్‌రావు చేతుల్లోకి కార్పొరేట్ యాజమాన్యం మారిన తర్వాత పరిణామాలు వేగంగా మారాయి. యాజమాన్యంతో విభేదాల కారణంగా రవిప్రకాష్ సంస్థను వీడాల్సి రావడం, చట్టపరమైన చిక్కులు ఎదుర్కొవడం మీడియా చరిత్రలో ఒక అధ్యాయం.
ఆ తర్వాత ఆ బాధ్యతలు అందిపుచ్చుకున్న రజనీకాంత్ యాజమాన్య వ్యాపార ప్రయోజనాలు మరియు రాజకీయ సమీకరణాల నడుమ సంపాదకీయ విధానం దెబ్బతినకుండా చాకచక్యంగా నడిపించే ప్రయత్నం చేశారు. పత్రికా రంగంతో సుదీర్ఘ అనుబంధం ఉన్న అనిల్ ఇనగంటి గతంలో మహా న్యూస్ సీఈఓగా, స్టూడియో ఎన్ నిర్వాహకుడిగా పనిచేసిన అనుభవంఉంది. జర్నలిజం అనుభవం మాత్రమే కాకుండా, నారా లోకేష్‌కు అత్యంత విశ్వాసపాత్రుడైన స్నేహితుడిగా, ఆయన ఆత్మీయ అంతరంగిక బృంద సభ్యుడిగా అనిల్‌కు ప్రత్యేక గుర్తింపు ఉంది. ‘వైఎస్ఆర్‌సీపీ మార్క్’ నుండి ‘టీడీపీ వైపు’ పొలిటికల్ ట్రాన్స్‌ఫర్మేషన్ కోసమే అనిల్ ఇనగంటికి సీఈఓ అబ్జర్వింగ్ ఎడిటర్ హోదా కల్పించారని విశ్లేషకులు భావిస్తున్నారు..అదే గనుక నిజమైతే దీంతోఇప్పటివరకు వైసీపీకి అనుకూలంగా ఉందనే ముద్ర పడిన టీవీ9, ఇకపై తెలుగుదేశం అనుకూల దిశగా రూపాంతరం చెందే అవకాశాలు స్పష్టంగా కనిపిస్తున్నాయి.
ఇటీవల టీవీ9 ప్రజల్లో కొంత విశ్వసనీయత కోల్పోయినప్పటికీ, ఇప్పటికీ రేటింగ్‌లలో అగ్రస్థానంలోనే కొనసాగుతోంది. అయితే ఈ హఠాత్ పరిణామం సంస్థ రేటింగ్‌లపై, వీక్షకుల నమ్మకంపై ఎలాంటి ప్రభావం చూపుతుందనేది ఆసక్తికరంగా మారింది. ఇది సాధారణ నియామకమా..? వ్యూహాత్మక అడుగా..? ఒప్పందమా.? ఎలాంటి వ్యూహంతో ఈ నియామకం జరిగిందనే విషయం పై విపరీతమైన చర్చ మొదలైంది. టీవీ9 లో లోకేష్ ముద్ర నిజమే అయితే అది కేవలం ఆ ఒక్క ఛానెల్‌కే పరిమితం కాకుండా, మొత్తం తెలుగు మీడియా రంగంలోనే ఒక కొత్త అధ్యాయానికి తెరలేపనుందన్న మాట ఇప్పుడు అందరి నోటా వినిపిస్తుంది.