భౌగోళికంగా అది ఉత్తర ఐర్లాండ్ లోని ఒక ద్వీపం కానీ అక్కడ వినిపించేవి కృష్ణ భజన్స్ కనిపించేది పూర్తి సనాతన వాతావరణం. ఆశర్యపోవాల్సిందే..! మన భారత దేశానికి దాదాపు ఎనిమిది వేల కిలోమీటర్ల దూరం లో ఉంది ఆ అద్భుత కృష్ణ ద్వీపం. ఫెర్మనా కౌంటీ (County Fermanagh) లోని ‘లాఫ్ ఎర్న్’ (Lough Erne) సరస్సు మధ్యలో ఉన్న ఇనిస్ రాత్ (Inis Rath) అనే ద్వీపమే ప్రపంచవ్యాప్తంగా “కృష్ణ ద్వీపం” (Krishna Island)గా ఇప్పుడు ప్రసిద్ధి చెందింది. సుమారు 22 ఎకరాల విస్తీర్ణంలో ఉన్న ఈ ద్వీపం ప్రకృతి రమణీయతకు, ప్రశాంతమైన ఆధ్యాత్మిక వాతావరణానికి నిలయంగా మారింది.
1982లో ఇంటర్నేషనల్ సొసైటీ ఫర్ కృష్ణ కాన్షియస్నెస్ (ఇస్కాన్ – ISKCON) మరి కొంత మంది కృష్ణ భక్తులు కలసి ఈ ద్వీపాన్ని కొనుగోలు చేసి, ఒక ఆధ్యాత్మిక ఆశ్రమంగా మార్చారు.
1986లో శ్రీ శ్రీ రాధా గోవింద’ మూర్తులను ప్రతిష్టించారు. అప్పటి నుండి ఐర్లాండ్ ప్రాంతంలో ఇది అత్యంత ముఖ్యమైన వైష్ణవ క్షేత్రంగా వెలుగొందుతుంది. ఈ ద్వీపంలో ఉన్న 19వ శతాబ్దపు విక్టోరియన్ కాలం నాటి భవనం (Victorian Mansion) లొనే హరేకృష్ణ ఆలయాన్ని ఏర్పాటు చేశారు.
ఎంత మంచు పడుతున్న ఎంత తీవ్రమైన చలిగాలులు వున్నా కూడా ప్రతిరోజూ వేకువజామున 3:30 గంటలకే ఆలయంలో పూజలు, హరేకృష్ణ మహామంత్ర జపం, ధ్యానం ప్రారంభమవుతాయి.అలాగే ద్వీపంలోకి అడుగుపెట్టే సందర్శకులు మద్యం తాగడం, పొగతాగడం, మాంసాహారం తీసుకోవడం పూర్తిగా ఇక్కడ నిషేధించారు. సాత్విక శాకాహార ప్రసాదాన్ని అందిస్తారు. ఈ ద్వీపంలో నెమళ్ళు, లేళ్ళు స్వేచ్ఛగా తిరుగుతుంటాయి. గోవులను పవిత్రంగా పూజిస్తూ, కేవలం పాల ఉత్పత్తుల కోసమే వాటిని పెంపొందిస్తారు. ఏటా శ్రీకృష్ణ జన్మాష్టమి ఉత్సవాల సమయంలో ఐర్లాండ్, బ్రిటన్ మరియు ఇతర దేశాల నుంచి వందలాది మంది పర్యాటకులు, భక్తులు ఇక్కడికి వస్తారు. నగర వాతావరణానికి దూరంగా ప్రశాంతమైన వాతావరణంలో ధ్యానం, భగవద్గీత అధ్యయనం చేసుకోవడానికి ఇదొక ప్రసిద్ధ రీట్రీట్ సెంటర్ (Retreat Centre) గా ఉపయోగపడుతోంది.
ప్రధాన భూభాగం నుండి ఈ ద్వీపానికి చేరుకోవడానికి సరస్సుపై ప్రత్యేక పడవల (Ferry) సౌకర్యం ఉంటుంది. ఈ ఫెర్రీ ప్రయాణాన్ని సందర్శకులకు ఉచితంగానే అందిస్తున్నారు.
పాశ్చాత్య దేశంలో పచ్చని ఐరిష్ ప్రకృతి ఒడిలో సనాతన సంస్కృతికి ప్రతీకగా నిలిచిన ఈ ‘కృష్ణ ద్వీపం’ విభిన్న సంస్కృతుల కలయికకు చక్కని ఉదాహరణ.