మిత్రపక్షం లోకి సొంత పార్టీ అభ్యర్థులు!
ఒకప్పుడు సిద్ధాంతాలు నచ్చి పార్టీలో చేరామని ప్రకటించేవారు.. పార్టీ మూల సిద్ధాంతాలను కాలరాస్తోందని రాజీనామా చేసి వెళ్లిపోయేవారు. అంతా సిద్ధాంతం చుట్టే తిరుగుతుండేది ఆనాటి రాజకీయం ఇప్పుడు ఆ సిద్ధాంతమే పూర్తిగా మారిపోయింది. పార్టీ కంటే గెలుపే ముఖ్యం అనే వేదాంతాన్ని ఒంటపట్టించుకుని బరిలోకి దిగుతున్నారు. పొత్తుల ప్రసక్తి ఎలా వున్నా సీటు ఒక పార్టీకి కేటాయిస్తే అభ్యర్థి మరో పార్టీ నుంచి వస్తున్నాడు. ఎన్నికల పొత్తుల్లో భాగంగా ఒక నియోజకవర్గాన్ని మిత్రపక్షానికి కేటాయిస్తే ఆ పార్టీకి అక్కడ గెలవగల బలమైన అభ్యర్థి లేకపోతే తమ మిత్రపక్షంలో అప్పటికే ఉన్న బలమైన నాయకుడికి కండువా కప్పి టికెట్ ఇచ్చేస్తున్నారు. ఇదే ఇప్పుడు ఆంధ్రప్రదేశ్ రాజకీయాల్లో చర్చనీయాంశంగా మారింది. విజయవాడలో వంగవీటి రాధాకృష్ణ జనసేనలో చేరడం తో ఈ చర్చకు మరింత ప్రాధాన్యం ఏర్పడింది.. జనసేన అధినేత పవన్ విజయవాడ మేయర్ అభ్యర్థిత్వంపై కూడా ఆయన పేరు ప్రచారంలో ఉన్న నేపథ్యంలో మేయర్ స్థానం జనసేనకు కేటాయించి రాధా కు సీటు ఇస్తారా అన్న ఊహాగానాలు మొదలయ్యాయి. వైఎస్సార్ కాంగ్రెస్ పార్టీ నుంచి బయటకు వచ్చిన తర్వాత రాధా 2024 ఎన్నికల్లో కూటమి అభ్యర్థుల కోసం పనిచేసి టీడీపీతో కలిసి ప్రయాణించినప్పటికీ, ఆయన అధికారికంగా ఆ పార్టీలో చేరలేదు.అయినప్పటికీ వంగవీటి రాధా ను టీడీపీ నేతగానే భావిస్తూ వస్తున్నారు. అయితే గత కొన్ని రోజులుగా మేయర్ అభ్యర్థిత్వంపై కధనాలు వెలువడుతుండడం ఇప్పుడు జనసేనలోకి ఆయన రావడం వెనుక రాజకీయ భవిష్యత్తు, స్థానిక ఎన్నికల్లో పాత్ర వంటి అంశాలపై చర్చ జరుగుతోంది.
రాధా చేరికను ముందుగానే జరిగిన ఒప్పందంగా వైసీపీ చెపుతుంటే జనసేన లోకి ఎప్పటినుంచో వెళ్లే ఆలోచన ఉందని ఇప్పటికి కుదిరిందని రాజకీయ విశ్లేషకులు వ్యాఖ్యానిస్తున్నారు.
ఇలా ఎన్నికలు ముంచుకొస్తున్న వేళ హఠాత్తుగా పార్టీ మారిన గత సందర్భాలను పరిశీలిస్తే
2024 ఎన్నికల్లో అవనిగడ్డ ఒక స్పష్టమైన ఉదాహరణ.
మాజీ మంత్రి, మండలి బుద్ధప్రసాద్ తెలుగుదేశం పార్టీ సీనియర్ నాయకుడు. అయితే కూటమి సీట్ల పంపకంలో అవనిగడ్డ జనసేనకు కేటాయించబడటంతో ఆయన జనసేనలో చేరి ఆ పార్టీ అభ్యర్థిగా పోటీ చేసి గెలుపొందారు.
తన పార్టీలో పనిచేసిన నాయకుడికి టికెట్ ఇవ్వలేని పరిస్థితిలో, కూటమి సర్దుబాటుకు అనుగుణంగా ఆయన మరో పార్టీ నుంచి పోటీ చేసే పరిస్థితి ఏర్పడింది. కానీ ఈ సర్దుబాటు పార్టీ అంతర్గతంగా అందరికీ ఆమోదయోగ్యంగా మారిందా? అనేది వేరే ప్రశ్న. బుద్ధప్రసాద్ జనసేనలో చేరినప్పుడు స్థానిక జనసేన నాయకుల నుంచి అభ్యంతరాలు వ్యక్తమైనప్పటికి ఒక నాయకుడి చేరిక అగ్రనాయకత్వానికి వ్యూహాత్మక పరిష్కారంగా కనిపించిన తరుణంలో క్షేత్రస్థాయిలో పనిచేసే కార్యకర్తలు తలొగ్గక తప్పలేదు. అదేవిధంగా అనపర్తి నియోజకవర్గానిది కూడా ఇదే కధ. కూటమి సర్దుబాటు లో భాగంగా ఆ స్థానాన్ని బీజేపీకి కేటాయిస్తే టీడీపీకి చెందిన మాజీ ఎమ్మెల్యే నల్లమిల్లి రామకృష్ణారెడ్డి అప్పటికే టీడీపీ టికెట్ ఆశించారు. బీజేపీ మరో అభ్యర్థిని ప్రకటించినప్పటికీ, స్థానిక రాజకీయ పరిస్థితులు, నల్లమిల్లి ప్రభావం తదితర అంశాల నేపథ్యంలో సర్దుబాట్లు జరిగి చివరకు నల్లమిల్లి బీజేపీలో చేరి ఆ పార్టీ తరఫున పోటీ చేసి అనపర్తి నుంచి బీజేపీ అభ్యర్థిగా శాసనశభ లోకి అడుగుపెట్టారు. అప్పట్లో బీజేపీ రాష్ట్ర నాయకత్వ నిర్ణయంపై పార్టీ లో అసంతృప్తి వ్యక్తమైంది. ఇతర పార్టీల నుంచి వచ్చిన నాయకులకు టికెట్లు ఇవ్వడం వల్ల కార్యకర్తల మనోధైర్యం దెబ్బతింటుందనే అభిప్రాయాలు కూడా బలంగానే వెలువడ్డాయి. అంటే, ఒక సీటును గెలుచుకోవడమే పార్టీ లక్ష్యమైతే స్థానికంగా బలమైన నాయకుడిని తీసుకోవడం సహజం గా కనిపించవచ్చుమో కానీ. కానీ ఒక పార్టీ దీర్ఘకాల ప్రయోజనాల విషయంలో, కార్యకర్తలు, స్థానిక నేతల మనోభావాల విషయంలో మాత్రం వేరే ఫలితాలను ఇస్తుందని చెప్తున్నారు రాజకీయ పండితులు.
ఇక భీమవరం నియోజకవర్గానిది వేరే వెర్షన్ అంజిబాబు గా పాపులర్ అయిన పులపర్తి రామాంజనేయులు, 2014లో టీడీపీ తరఫున ఎమ్మెల్యేగా ఎన్నికయ్యారు. 2019లో టీడీపీ అభ్యర్థిగా పవన్ కల్యాణ్‌పై భీమవరంలోనే పోటీ చేశారు 2024 ఎన్నికలకు ముందు జనసేనలో చేరి, మళ్లీ అదే భీమవరం నుంచి జనసేన అభ్యర్థిగా పోటీ చేశారు. రాజకీయాల్లో ప్రత్యర్థులు శాశ్వతంగా ఉండరనే మాటకు ఇది ఒక ఉదాహరణ. ముందు జరిగిన ఎన్నికల్లో వేర్వేరు పార్టీల తరఫున పోటీ చేసిన నాయకులు, మరుసటి ఎన్నికల్లో ఒకే కూటమిలో భాగస్వాములవుతున్నారు. అంతేకాదు, దీన్ని అవకాశవాద రాజకీయంగా చూడాలా? లేక పొత్తు ధర్మంలో భాగంగా చూడాలా అనేది పరిస్థితులను బట్టి సమాధానం మారుతూనేవుంటుంది.
ఒక నియోజకవర్గంలో పార్టీకి ఉన్న నాయకత్వాన్ని, గెలుపు అవకాశాలను, కూటమి ప్రయోజనాలను పరిగణనలోకి తీసుకొని నిర్ణయం తీసుకోవడం రాజకీయ వ్యూహంలో భాగమే కానీ ఇప్పటికే పార్టీ కోసం పనిచేసిన నాయకులకు అవకాశం ఇవ్వకుండా, చివరి నిమిషంలో హఠాత్తుగా పార్టీ లోకి వచ్చిన వ్యక్తికి టికెట్ కేటాయిస్తే, ఆ నిర్ణయం వెనుక ఉన్న కారణాలను పార్టీ నాయకత్వం తప్పకుండా వివరించాల్సిన అవసరమైతే కచ్చితంగా ఉంటుంది. నిజానికి ఈ విధానం ఏ ఒక్క పార్టీకో సంబంధించినది కాదు. ఎన్నికల పొత్తుల్లో సీట్ల పంపకం, అభ్యర్థుల ఎంపిక, స్థానిక రాజకీయ బలాబలాలు పరస్పరం ముడిపడినప్పుడు అనేక పార్టీలూ ఇలాంటి నిర్ణయాలు తీసుకుంటుంటాయి.
2024 ఎన్నికలకు ముందు జనసేనలోకి ఇతర పార్టీల నుంచి వచ్చిన పలువురు నాయకులకు టికెట్లు దక్కాయి. ఆ సమయంలో జనసేన ప్రకటించిన 21 అసెంబ్లీ అభ్యర్థుల జాబితా లో ఎనిమిది మంది ఇతర పార్టీల నుంచి వచ్చిన నాయకులే కావడం గమనార్హం..!
దాదాపుగా జనసేన టీడీపీ మధ్య సర్దుబాటు పూర్తయిన తరుణం లో మరికొన్ని మేల్ మెరుపులు తళుక్కు మనే అవకాశం ఉందని రాజకీయ విశ్లేషకులు భావిస్తున్నారు. వాటిని కొత్తగానో.. గొప్పగానో చూడాల్సిన అవసరం లేదంటున్నారు.ఇక విజయవాడ మేయర్ స్థానం జనసేనకు కేటాయింపు పై స్పష్టత రాలేదనే చెప్పాలి..? ఒకవేళ కేటాయిస్తే రాధాకృష్ణ పోటీలో ఉంటారా? లేక ఆయనకు వేరే బాధ్యతలు అప్పగిస్తారా? అన్నది ఇంకా క్లారిటీ రావాల్సిన అంశం.
ఆంధ్రప్రదేశ్ రాజకీయాల్లో పొత్తులు, చేరికలు, టికెట్ల పంపకం చూస్తుంటే ఒక ఆసక్తికరమైన మార్పు కనిపిస్తోంది. గతంలో పార్టీ నాయకులను తయారు చేసుకొని, వారిని ప్రజల్లోకి పంపి, వారి ద్వారా సంస్థను బలోపేతం చేసుకోవాలనే ఆలోచనకు ప్రాధాన్యం ఉండేది. ఇప్పుడు కొన్ని సందర్భాల్లో స్థానికంగా గుర్తింపు ఉన్న నాయకుడిని ఎంచుకొని, ఆ తర్వాత ఆయనకు అనుకూలంగా పార్టీ టికెట్, పొత్తు సర్దుబాట్లు చేసుకునే ధోరణి కనిపిస్తోంది. బలమైన నాయకులను చేర్చుకోవడం పార్టీ విస్తరణకు ఉపయోగపడొచ్చేమో గాని అదే సమయంలో సొంత పార్టీ నేతలకు అవకాశాలు తగ్గితే సంస్థాగత సమస్యలు ఏర్పడే ప్రమాదం లేకపోలేదు.