గిన్నిస్ గుర్తించిన వింతలోకం
ప్రపంచ వ్యాప్తంగా ఎన్నో ద్వీపాలు ఉన్నాయి.. ఆహ్లాదకరమైనవి కొన్ని.. ఆశ్చర్యపరిచేవి కొన్ని… భయపెట్టేవి ఇంకొన్నాయితే.. మరికొన్ని ద్వీపాలు షాక్ కి గురిచేస్తాయి.. మెక్సికో సిటీకి దక్షిణంగా ఉన్న జోచిమిల్కో కాలువలలో లగున డి టెకిలా చినాంపా ద్వీపం నిజం గా మనల్ని షాక్ కి గురిచేస్తుంది. ఈ ద్వీపాన్ని బొమ్మల ద్వీపం DOLLS ISLAND అని పిలుస్తుంటారు. ఈ ద్వీపం లో వివిధ రకాల బొమ్మలు ఇక్కడ ఉన్నాయి. గిన్నిస్ బుక్ ఆఫ్ వరల్డ్ రికార్డ్స్ ఈ ద్వీపాన్ని ప్రపంచంలోనే అతిపెద్ద హాంటెడ్ బొమ్మల సేకరణ కేంద్రం గా దీన్ని గుర్తించి రికార్డుల్లో నమోదు చేసింది.
స్థానిక కథనాల ప్రకారం ఈ ద్వీప యజమాని డాన్ జూలియన్ సాంటానా బర్రెరా అక్కడి కాలువ లో తేలుతున్న ఒక అమ్మాయి డెడ్ బాడీ చూశాడని ఒక కధనం. కాలువ లో మునిగిపోతున్న ఒక యువతి ని రక్షించాలని ప్రయత్నిస్తే అది విఫలం అయి ఆ అమ్మాయి మరణించిందని మరో విషయం ప్రచారం లో ఉంది. ఆ సంగతి పక్కన పెడితే ఆ మరుసటి రోజు అదే కాలువలో కొట్టుకుపోతున్న ఒక బొమ్మను చూడటం తో ఆ బొమ్మ ఆ అమ్మాయిదే నని నమ్మి ఆమె జ్ఞాపకార్థం దుష్టశక్తులను దూరం చెయ్యాలన్న ఉద్దేశ్యం తో ఒక బొమ్మను అక్కడి చెట్టుకు వేలాడదీశాట. ఆ మరుసటి రోజు కూడా కాలువలో మరోబొమ్మ దొరకడంతో ఆమె మరణం తర్వాత ఆ యువతి ఆత్మ ద్వీపాన్ని వెంటాడిందని అందుకే ఆమె ఆత్మను శాంతింపజేయడానికి బర్రెరా బొమ్మలను సేకరించి ఇక్కడ పెట్టేవాడన్న ఊహాగానాలు ఉన్నాయి. అయితే ఈ సంఘటనకు సంబంధించిన ఆధారాలు ఏవీ ధృవీకరించబడలేదు. ఆ తరువాత బొమ్మల కొలువు లా ద్వీపం రూపాంతరం చెందడం మొదలైంది. ఇక్కడ పెడుతున్న బొమ్మల్లో కొన్ని అతి భయంకరంగా.. మరికొన్ని అతీంద్రియ శక్తుల చిహ్నాలుగా కనిపించడంతో ఈ ద్వీపం హాంటెడ్ పర్యాటకానికి ప్రసిద్ధ గమ్యస్థానంగా మారిపోయింది.
2001లో తన మామకు సహాయం చేయడానికి ద్వీపానికి వచ్చిన బర్రెరా మేనల్లుడు కాలువలో చేపలు పడుతుండగా అప్పటికే 80 ఏళ్ల వృద్ధుడైన బర్రెరా, ఇక్కడి మత్స్యకన్యలు తనను రమ్మంటున్నాయని చెప్పిన కొంతసేపటి తరువాత బర్రెరా నిర్జీవంగా, కాలువలో పడి ఉండటం గమనించాడు.. ఎక్కడైతే అమ్మాయి శవం లభ్యమైందో అదే ప్రాంతంలో ద్వీప యజమాని ప్రాణాలు కోల్పోయాడు. 2001లో బర్రెరా మరణానంతరం ఆయన కుటుంబం ఈ ద్వీపాన్ని పర్యాటక ఆకర్షణగా ప్రజలకు తెరిచింది. వందలాది బొమ్మలతో పాటు, ఆ ప్రాంతంలో కొన్ని కాటేజీలను, ఒక చిన్న మ్యూజియం కూడా ఏర్పాటు చేశారు. ఇందులో ఈ ద్వీపానికి సంభందించి పేపర్లలో వచ్చిన ఆర్టికల్స్ ఈ ద్వీప విశేషాలు అలాగే బర్రెరా సేకరించిన మొదటి బొమ్మ తో పాటు ఆయన ఇష్టపడ్డ బొమ్మ అగస్టినా వంటివి ఇందులో ఉంచారు. ఇక్కడికి వచ్చిన టూరిస్టులు కొత్త అనుభూతులను చెప్పడం మొదలుపెట్టారు. బొమ్మలు తలలను, చేతులను కదిలిస్తున్నాయని కళ్ళు తెరిచి తమనే చూస్తున్నాయన్న పుకార్లు చక్కర్లు కొట్టాయి. బొమ్మలు ఒకదానికొకటి మాట్లాడుకుంటున్నాయని కొందరు టూరిస్టులు చెప్పుకోవడం కూడా వైరల్ అయింది. మరికొంత మంది పర్యాటకులు బొమ్మలకి నైవేద్యాలు పెట్టడం , వాటికి బట్టలు మార్చి కొత్తగా తయారుచేసి పూజలు నిర్వహించడం వంటివి చెయ్యడం తో ఈ ప్రాంతం హాట్ టాపిక్ అయింది.
పారానార్మల్ ఆక్టివిటీస్ పై నమ్మకం ఉన్న కొంతమంది ద్వీపం గురించి వినిపిస్తున్న కధనాలను నమ్ముతామనంటున్నారు. ఈ ద్వీపం గురించి అనేక మీడియాల్లో కధనాలు వచ్చాయి. కొన్ని సంస్థలు దీని షో లను కూడా నిర్వహించారు. అమెజాన్ ప్రైమ్ Amazon prime, ఎక్స్పెడిషన్ X షో కోసం ఘోస్ట్ హంటర్స్ షో, హిస్టరీ ఛానల్ History channel (US) అన్బిలీవబుల్, ఫేస్బుక్ వీడియో గేమ్ క్రిమినల్ కేస్ సూపర్నేచురల్ ఇన్వెస్టిగేషన్స్ లో వంటి అనేక షో లలో డాల్స్ ఐలెండ్ గురించి చూపించారు.