అభిమానులతో కలిసి థియేటర్లో సినిమా చూడటం టాలీవుడ్లో చాలాకాలంగా కనిపిస్తున్న సంప్రదాయం. కానీ ఇప్పుడు అదే స్టార్ విజిట్ పోలీసులకు పెద్ద భద్రతా సవాల్గా మారింది. తాజాగా ‘ది ప్యారడైజ్’ ప్రీమియర్ను హైదరాబాద్ ఆర్టీసీ క్రాస్రోడ్స్లో ప్రేక్షకులతో కలిసి చూడాలన్న నాని కోరికకు పోలీసుల అనుమతి విషయంలో బ్రేక్ పడింది. నాని తన సినిమాను ప్రేక్షకులతో కలిసి థియేటర్లో చూడాలని కోరుతూ తెలంగాణ సీఎం రేవంత్రెడ్డి, సినిమాటోగ్రఫీ మంత్రి, తెలంగాణ పోలీసులను ట్యాగ్ చేస్తూ విజ్ఞప్తి చేశారు. సినిమా అనుభూతిని ప్రేక్షకులతో కలిసి ప్రత్యక్షంగా ఆస్వాదించాలనేదే తన ఉద్దేశమని ఆయన పేర్కొన్నారు. అయితే ప్రజా భద్రత, ట్రాఫిక్, క్రౌడ్ మేనేజ్మెంట్ అంశాలను దృష్టిలో పెట్టుకుని ముందుగా స్థానిక పోలీస్ స్టేషన్కు అధికారికంగా దరఖాస్తు చేసుకోవాలని సీఎం సూచించారు. తుది నిర్ణయం పోలీసుల పరిశీలన తర్వాతే ఉంటుందని స్పష్టం చేశారు. అయితే గణేష్ నిమజ్జనం కారణం గా అనుమతి ఇవ్వలేమని పోలీసులు స్పష్టం చెయ్యడం తో నాని ధియేటర్ విజిట్ రద్దయింది. నిమజ్జన కారణం గా అనుమతి ఇవ్వలేకపోతున్నామని పోలీసులు చెప్పినప్పటికీ గతానుభవ దృష్ట్యా ఈ నిర్ణయం తీసుకున్నట్లు తెలుస్తోంది.
ఆర్టీసీ క్రాస్రోడ్స్లోని సంధ్య థియేటర్కు అల్లు అర్జున్ థియేటర్కు రావడంతో భారీగా అభిమానులు, ప్రేక్షకులు అక్కడికి చేరుకోవడం తో జరిగిన తొక్కిసలాటలో రేవతి అనే మహిళ మృతి చెందగా, ఆమె కుమారుడు తీవ్రంగా గాయపడ్డాడు. ఈ ఘటన తర్వాత సెలబ్రిటీలు థియేటర్లకు వచ్చే సందర్భాల్లో భద్రత, జన నియంత్రణ, ట్రాఫిక్ నిర్వహణ అంశాలపై పోలీసుల అప్రమత్తత మరింత పెరిగింది. ఈ ఘటనకు సంబంధించి నటుడు అల్లు అర్జున్, సినిమా బృందం, థియేటర్ యాజమాన్యంపై కేసులు నమోదవ్వగా పోలీసులను మందలించిన సందర్భం కూడా ఎదురైంది. అందుకే నాని కోరుకున్నది కేవలం ఒక సినిమా చూడటానికి థియేటర్ సందర్శన అయినప్పటికీ… పోలీసుల దృష్టిలో అది సాధారణ ప్రేక్షకుడి థియేటర్ విజిట్ కాదు. ఒక స్టార్ వస్తున్నాడంటే అభిమానుల స్పందన ఎంతగా పెరుగుతుంది? దాని వల్ల ట్రాఫిక్, థియేటర్ పరిసరాల్లో భద్రతా పరిస్థితులు ఎలా మారతాయి? అనే అంశాలనే అధికారులు ముందుగా పరిగణనలోకి తీసుకోవాల్సి ఉంటుంది. పోలీసుల నిర్ణయాన్ని తాను గౌరవిస్తానని నాని స్పష్టం చేశారు. గణేష్ నిమజ్జన ఏర్పాట్ల నేపథ్యంలో పోలీసు యంత్రాంగంపై అదనపు భారం పడకూడదని, భద్రత లేదా క్రౌడ్ మేనేజ్మెంట్లో ఇబ్బందులు ఉంటే థియేటర్ సందర్శనను పూర్తిగా విరమించుకోవడానికి సిద్ధమన్నారు. ఒకప్పుడు హీరో థియేటర్కు వచ్చాడంటే అది సినిమాకు అదనపు ప్రచారం. ఇప్పుడు అదే అంశం పబ్లిక్ సేఫ్టీ ప్రశ్నగా మారింది. ‘పుష్ప–2’ ఘటన తర్వాత ఒక విషయం స్పష్టమైంది—స్టార్ పవర్ ఎంత పెద్దదైనా, వేలాది మంది ఒకేచోట చేరినప్పుడు చిన్న లోపం కూడా తీవ్ర పరిణామాలకు దారితీయవచ్చు. అందుకే నాని విషయంలోనూ పోలీసులు వ్యక్తిగతంగా హీరోను అడ్డుకోవడం కంటే, ఆయన రాకతో ఏర్పడే జనసమూహాన్ని ఎలా నియంత్రించాలి? అన్న కోణంలో నిర్ణయం తీసుకుంటున్నట్లు తాజా పరిణామాలు సూచిస్తున్నాయి. సినిమా వినోదం కావచ్చు… కానీ ప్రేక్షకుల భద్రత విషయంలో మాత్రం రాజీకి అవకాశం లేదన్నదే తాజా పరిణామాల సారాంశం.