తెలుగు సినిమా ప్రేక్షకులకు ఈవీవీ సత్యనారాయణ పేరు అంటే అప్పటివరకు ప్రధానంగా కామెడీ, కుటుంబ వినోదం గుర్తొచ్చేది. కానీ అదే సమయంలో ఆయన ఒక భిన్నమైన ప్రయోగానికి శ్రీకారం చుట్టారు. వివాహ బంధం, భార్యాభర్తల మధ్య అపార్థాలు, అనుమానాలు, దాంపత్య సమస్యలు, వివాహేతర సంబంధాలు, మహిళలపై భర్తల ప్రవర్తన వంటి అంశాలను బోల్డ్‌గా తెరపైకి తీసుకొచ్చిన చిత్రం ‘ఆరుగురు పతివ్రతలు’. 2004లో వచ్చిన ఈ సినిమా ఇప్పుడు 22 ఏళ్ల తర్వాత 4K వెర్షన్‌లో అక్టోబర్ 29, 2026న థియేటర్లలోకి రానుంది. పోచమ్మ ఫిల్మ్స్ దీనిని విడుదల చేస్తుంది.
ఈవీవీ సత్యనారాయణ అంటే కామెడీకి కొత్త నిర్వచనం ఇచ్చిన దర్శకుడనే గుర్తింపు ఉంది. అయితే ‘ఆరుగురు పతివ్రతలు’ విషయంలో ఆయన సాధారణ కామెడీ ఫార్ములాకు భిన్నంగా సామాజిక అంశాలను బోల్డ్ ట్రీట్‌మెంట్‌తో చెప్పే ప్రయత్నం చేశారు.ఈ సినిమాకు కథ, స్క్రీన్‌ప్లే, దర్శకత్వంతో పాటు నిర్మాతగా కూడా ఈవీవీ వ్యవహరించారు.
పదో తరగతిలో కలిసి చదువుకున్న ఆరుగురు స్నేహితురాళ్లు కొంతకాలం తర్వాత ఒక వివాహ సందర్భంలో మళ్లీ కలుసుకుంటారు. అప్పటికే వారిలో ఐదుగురు వివాహం చేసుకుని ఉంటారు. మరో స్నేహితురాలు పెళ్లికి సిద్ధమవుతూ ఉంటుంది. అక్కడ మొదలయ్యే సంభాషణే సినిమా లో అసలు కథ మొదలవుతుంది. దాంపత్యంలో వ్యక్తిగత స్వేచ్ఛకు ఎంత స్థానం ఉంది? భార్యాభర్తల మధ్య శారీరక, మానసిక అనుబంధం ఎలా మారుతుంది? అనే ప్రశ్నలను ఆరుగురు మహిళల జీవితాల ద్వారా సినిమా చెప్పే ప్రయత్నం చేస్తుంది. ఈ సినిమాకు సంబంధించిన ఆసక్తికరమైన విషయాల్లో భారీ సంఖ్యలో కొత్త నటీనటులను పరిచయం చేయడం ఒకటి. ఈ సినిమా ద్వారా దాదాపు 42 మంది కొత్త నటీనటులు తెలుగు చిత్ర పరిశ్రమకు పరిచయమయ్యారు. ఇందులో ఆరుగురు హీరోలు, ఆరుగురు హీరోయిన్లు, కామెడీ పాత్రలు, బాలనటులు తదితర విభాగాల్లో కొత్తవారికి అవకాశం ఇచ్చారు. వారితో పాటు ఎల్.బి. శ్రీరామ్, చలపతిరావు తదితరులు కీలక పాత్రల్లో కనిపించారు. అంటే ఒకవైపు ప్రయోగాత్మక కథనం… మరోవైపు దాదాపు మొత్తం కొత్త నటీనటులతో సినిమా చేయడం. ఆ కాలానికి ఇది చిన్న ప్రయోగం కాదు. జనార్ధన మహర్షి మాటలు హైలెట్ గా పాటలు లేకుండా వచ్చిన ‘ఆరుగురు పతివ్రతలు’ అప్పటి తెలుగు కమర్షియల్ సినిమా ఫార్మాట్‌తో పోలిస్తే ఒక విభిన్నమైన నిర్ణయం. విడుదల సమయంలో భారీ కమర్షియల్ హిట్‌గా కాకుండా, కాలక్రమేణా ప్రత్యేక గుర్తింపు పొందిన సినిమాగా ఈ చిత్రం గుర్తింపు పొందింది. ఈ సినిమా చర్చించే కొన్ని అంశాలు కాలంతో పెద్దగా మారలేదు. అనుమానం, అపార్థం, ఈగో దాంపత్యంలో ఆధిపత్యం,
భార్యాభర్తల మధ్య కమ్యూనికేషన్ గ్యాప్, వివాహేతర సంబంధాలు, మహిళలపై కుటుంబ ఒత్తిడి , వ్యక్తిగత స్వేచ్ఛ ఇలాంటి అంశాలు ఇప్పటికీ కుటుంబ సంబంధాల్లో చర్చకు వస్తూనే ఉన్నాయి. అందుకే ఈవీవీ 2004లో చెప్పిన కొన్ని ప్రశ్నలు 2026లో కూడా ప్రేక్షకులకు కొత్తగా అనిపించే అవకాశం ఉంది.
ఒక దర్శకుడు 22 ఏళ్ల క్రితం చేసిన ప్రయోగాన్ని… ఈ తరం ప్రేక్షకులు ఎలా స్వీకరిస్తారన్నదే అసలు ప్రశ్న.
అప్పట్లో వివాదాస్పదంగా లేదా బోల్డ్‌గా అనిపించిన అంశాలు ఇప్పుడు ఎంతవరకు సాధారణ చర్చలుగా మారాయి?
అప్పటి హాస్యం ఇప్పుడు ఎలా అనిపిస్తుంది?
కొత్త తరం ప్రేక్షకులు ఈ కథనంతో కనెక్ట్ అవుతారా?
ఈవీవీ శైలిలోని కామెడీకి థియేటర్లలో మళ్లీ స్పందన వస్తుందా?
ఇవే ఈ రీరిలీజ్‌ పై ఆసక్తిని పెంచుతున్నాయి. 22 ఏళ్ల క్రితం థియేటర్లలో తనదైన ముద్ర వేసిన ‘ఆరుగురు పతివ్రతలు’… ఇప్పుడు 4K తెరపైకి వస్తోంది. అప్పుడు ప్రేక్షకులను ఆశ్చర్యపరిచిన అంశాలు… ఇప్పుడు ప్రేక్షకులను ఆలోచింపజేస్తాయా? అదే ఈ రీరిలీజ్‌కు అసలు ఆసక్తికరమైన పరీక్ష. అక్టోబర్ 29న దీనికి సమాధానం థియేటర్లలోనే రానుంది.