కర్నాటక రాజధాని బెంగుళూరులో గత నెల 20వ తేదీన జరిగిన రేవ్ పార్టీ టాలీవుడ్‌తో పాటు ఏపీ పాలిటిక్స్‌లో సంచలనం సృష్టించిన విషయం తెలిసిందే.ఈ పార్టీలో పలువురు టాలీవుడ్ సెలబ్రెటీలు, రాజకీయ నాయకులు పాల్గొనడంతో హాట్ టాపిక్‌గా మారింది. ఈ రేవ్ పార్టీలో పాల్గొన్న టాలీవుడ్ యాక్టర్ హేమపై బెంగుళూరు సీసీబీ పోలీసులు కేసు నమోదు చేశారు. డ్రగ్స్ నిర్థారణ పరీక్షల్లోనూ నటి హేమ డ్రగ్స్ తీసుకున్నట్లు తేలినట్లు సమాచారం. ఈ మేరకు విచారణకు హాజరు కావాలని హేమకు సీసీబీ పోలీసులు నోటీసులు జారీ చేయగా..అనారోగ్యం కారణంగా విచారణకు హాజరు కావడం లేదని ఆమె పోలీసులకు లేఖ రాశారు. విచారణకు హేమ డుమ్మా కొట్టడటంతో సీరియస్‌గా ఉన్న బెంగుళూరు సీసీబీ పోలీసులు ఇవాళ ఆమెను అదుపులోకి తీసుకున్నట్లు సమాచారం. నటి హేమను రేపు (మంగళవారం) పోలీసులు కోర్టులో ప్రవేశపెట్టనున్నట్లు తెలుస్తోంది. కాగా, దీనికి సంబంధించిన పూర్తి వివరాలు తెలియాల్సి ఉంది.