అమెరికా అధ్యక్షుడు డొనాల్డ్ ట్రంప్, ఇరాన్ మధ్య తీవ్ర ఉద్రిక్తతలు కొనసాగుతున్న వేళ.. అనూహ్యంగా తెలుగు సినిమా అంతర్జాతీయ దౌత్య చర్చలోకి వచ్చింది. ట్రంప్ ఇరాన్ను నాశనం చేస్తామని హెచ్చరించిన నేపథ్యంలో.. ఇరాన్ రాయబార కార్యాలయం నేరుగా రాజకీయ ప్రకటన చేయకుండా సినిమా సన్నివేశంతో స్పందించింది. ఇప్పుడా పోస్ట్ నెట్టింట వైరల్ గా మారింది.
ఇరాన్ ఎంబసీ ఇన్ జింబాబ్వే తన ‘X’ ఖాతాలో నందమూరి బాలకృష్ణ నటించిన ‘భగవంత్ కేసరి’ చిత్రంలోని సుమారు 58 సెకన్ల యాక్షన్ క్లిప్ను షేర్ చేసి ట్రంప్ ఇరాన్ను నాశనం చేస్తామని మాట్లాడుతున్నా, ఇరాన్ “నిస్సహాయంగా లేదనే విషయం ఆయనకు తెలుసు” అన్న భావనతో పోస్టు పెట్టింది. ఒక అంతర్జాతీయ రాజకీయ యుద్ద వివాదంలో తెలుగు సినిమా సన్నివేశం ఇలా ఉపయోగించబడటం ఇదే మొదటిసారి కాగా ఈ పోస్ట్ తో టాలీవుడ్కు మరో రకమైన గ్లోబల్ గుర్తింపును తీసుకొచ్చింది.
ఇరాన్ రాయబార కార్యాలయం తన పోస్టులో అమెరికా అధ్యక్షుడు, ఆయన యంత్రాంగం హాలీవుడ్కు బదులుగా బాలీవుడ్ చిత్రాలు చూస్తున్నారని వ్యంగ్యంగా పేర్కొంది. ఇరాన్ పోస్ట్ చేసిన ఈ సన్నివేశం బాలీవుడ్ సినిమా కాదు.. 2023 లో విడుదలైన తెలుగు సినిమా. ఈ పొరపాటే సోషల్ మీడియాలో చర్చకు దారితీసింది. ఇది బాలీవుడ్ కాదు.. టాలీవుడ్ అంటూ తెలుగు సినిమా అభిమానులు రీట్వీట్ లతో రెస్పాన్డ్ అవుతున్నారు. ఏదిఏమైనా ఇరాన్ చేసిన రాజకీయ వ్యంగ్యంలో అనుకోకుండా టాలీవుడ్ సినిమాకు అంతర్జాతీయ ప్రచారం దక్కింది. సోషల్ మీడియా యుగంలో మీమ్స్, సినిమాల సన్నివేశాలు, కూడా దౌత్య సందేశాలకు వేదికగా మారుతున్న నేపథ్యంలో ‘భగవంత్ కేసరి’ సన్నివేశాన్ని ఎంచుకోవడం ద్వారా ఇరాన్ ఒక రాజకీయ హెచ్చరికను ప్రజలకు సులభంగా అర్థమయ్యే విజువల్ రూపంలో చెప్పే ప్రయత్నం చేసినట్లు కనిపిస్తోంది. అయితే ఈ పోస్టు ను అధికారిక సైనిక ప్రకటన కంటే సోషల్ మీడియా కమ్యూనికేషన్, వ్యంగ్య స్పందనగా చూడటం గమనార్హం.