ప్రస్తుతం సోషల్ మీడియాలో వైరల్ అవుతున్న “అర్జెంటీనాలో సముద్రం ఒక్కసారిగా వెనక్కి వెళ్లిపోయింది” అన్న దృశ్యాలు హల్చల్ చేస్తున్నాయి. ఆర్టిఫిషియల్ ఇంటెలిజెన్స్ యుగం లో ఏది నిజమో ఏది అబద్ధమో తెలియకుండా పోతున్న తరుణం లో ఫ్యాక్ట్ చెక్ కు ప్రాధాన్యత ఏర్పడింది. నిజానికి కొన్ని దృశ్యాలు వాస్తవమైతే మరికొన్ని పాత దృశ్యాలను ai తో రీస్టోర్ చేసి ప్రచారం చేసేస్తున్నారు. నిజానికి
సముద్రం ఒక్కసారిగా వెనక్కి వెళ్లిన మాట సముద్ర గర్భంలో దాగి ఉన్న భారీ రాతి నిర్మాణం బయటపడిన మాట వాస్తవం.. దీంతో సోషల్ మీడియాలో రకరకాల ప్రచారాలు మొదలయ్యాయి.
అర్జెంటీనాలో చోటుచేసుకున్న ఈ అరుదైన దృశ్యాలు ఇప్పుడు ప్రపంచవ్యాప్తంగా చర్చనీయాంశంగా మారాయి. అయితే ఇది సముద్రం ఎండిపోవడం కాదు.. అంతకంటే ఆసక్తికరమైన సహజ ప్రక్రియ. కొంత మంది ఇరవై మూడు కిలోమీటర్లని మరికొందరు ఏడు కిలోమీటర్లని రకరకాల కథనాలను వండి వార్చుతున్నారు. అలాంటి న్యూస్ విపరీతంగా షేర్ అవుతున్నాయి. ఆగస్టు లో జరిగితే ఇది ఇప్పుడు వైరల్ అయింది. అర్జెంటీనాలోని మార్ డెల్ ప్లాటా తీరంలో ఆగస్టులో సముద్ర మట్టం అసాధారణంగా తగ్గడంతో సాధారణంగా నీటిలో మునిగి ఉండే ‘రెస్టింగా డెల్ ఫారో’ అనే సహజ రాతి నిర్మాణం బయటకు కనిపించింది. కొందరికి అది కొత్తగా సముద్రం నుంచి బయటపడిన ద్వీపంలా కనిపించింది. వాస్తవానికి అది అక్కడే ఉన్న సహజ శిలా నిర్మాణం. నీటి మట్టం తగ్గడంతో మాత్రమే అది స్పష్టంగా కనిపించింది.
అసాధారణంగా లో టైడ్ (Low Tide), సముద్రం నుంచి భూమి వైపు కాకుండా బయటకు వీచిన గాలులు, వాతావరణ పీడనంలోని మార్పులు కలిసి సముద్రపు నీటి మట్టాన్ని తాత్కాలికంగా తగ్గించాయి. సాధారణంగా చంద్రుడు, సూర్యుడి గురుత్వాకర్షణ ప్రభావంతో సముద్రంలో ఆటుపోట్లు ఏర్పడుతుంటాయి. అయితే కొన్ని సందర్భాల్లో లో టైడ్ సమయంలో గాలి కూడా సముద్రపు నీటిని తీరానికి దూరంగా నెట్టివేస్తే, తీరప్రాంతంలో నీటి మట్టం సాధారణం కంటే మరింత తగ్గుతుంది. దీనినే Wind Setdown అని శాస్త్రవేత్తలు పేర్కొంటారు. సముద్రం ఒక్కసారిగా వెనక్కి వెళ్లడం కనిపిస్తే సహజంగానే సునామీ భయం కలుగుతుంది. ఎందుకంటే భారీ సునామీకి ముందు కొన్ని ప్రాంతాల్లో సముద్రపు నీరు అకస్మాత్తుగా వెనక్కి వెళ్లిన సందర్భాలు ఉన్నాయి.
కానీ మార్ డెల్ ప్లాటా వద్ద నమోదైన ఈ ఘటనకు సునామీతో సంబంధం ఉన్నట్లు ఆధారాలు లేవు. స్థానికంగా నమోదైన పరిస్థితులు జ్వారం, గాలి, వాతావరణ పీడన మార్పులతోనే వివరించవచ్చని నిపుణులు చెబుతున్నారు.
ఈ ఘటనకు సంబంధించిన వీడియోల పేరుతో సోషల్ మీడియాలో ప్రచారంలో ఉన్న ప్రతి వీడియో అర్జెంటీనాదే కాదు. భారీ నౌకలు నీరు లేకుండా మట్టిలో చిక్కుకున్నట్లుగా కనిపించే కొన్ని వైరల్ దృశ్యాలు వాస్తవానికి భారత్లోని గుజరాత్లో ఉన్న అలాంగ్ షిప్-బ్రేకింగ్ యార్డ్కు సంబంధించినవిగా ఫ్యాక్ట్ చెకర్లు గుర్తించారు.
అందువల్ల “అర్జెంటీనాలో సముద్రం 20కి పైగా కిలోమీటర్లు వెనక్కి వెళ్లిపోయింది” వంటి ప్రచారాలలో ఎంత మాత్రం నిజం లేదు. ప్రస్తుత ఘటనను చూసి భూకంపం, సునామీ లేదా సముద్రం శాశ్వతంగా వెనక్కి వెళ్లిపోతుందనే నిర్ణయానికి రావడం సరైంది కాదు. సముద్రం అదృశ్యం కాలేదు.. తాత్కాలికంగా నీటి మట్టం తగ్గింది. కొంత సమయం తర్వాత నీరు తిరిగి సాధారణ స్థితికి చేరుకుంది. అయితే ఈ ఘటన మరో విషయాన్ని మాత్రం గుర్తు చేస్తోంది. అందుకే అర్జెంటీనాలో కనిపించిన దృశ్యం భయానకమైన ప్రకృతి విపత్తుకు సంకేతం కంటే.. సముద్రం వెనుక పనిచేసే సంక్లిష్టమైన సహజ శక్తులకు కనిపించిన ఒక అరుదైన ఉదాహరణగా చూడటం శాస్త్రీయంగా సరైనది. ‘సముద్రం ఎండిపోయింది’, ‘భూమి సముద్రాన్ని లోపలికి లాగేసింది’, ‘సముద్ర గర్భం పగిలిపోయింది’, ‘కలియుగం అంతం మొదలైందా..? వంటి ప్రచారాలకు అస్సలు ఆధారాలు లేవు. మరి వైరల్ వీడియో నిజమేనా? అంటే కొన్ని వీడియో లు మాత్రమే నిజమైనవి. కానీ వైరల్ అవుతున్న కొన్ని కథనాలు పూర్తి అవాస్తవాలుగా గమనించాల్సి ఉంటుంది