ఆది దేవుని పండుగను జరుపుకునే పుణ్యమాసం భాద్రపదమాసం.. వరుస పండగలు స్వాగతం పలికే ఈ మాసం అత్యంత విశిష్టమైనది. వినాయక వ్రతం తో పాటు మరిన్ని విశేష పూజలు వ్రతాలు ఈ మాసంలో జరుపుకుంటారు. శ్రావణమాసం లక్ష్మికి వ్రతాలు చేసిన మహిళలు ఈ భాద్రపద శుక్ల తదియ రోజున హరితాళిక వ్రతాన్ని కొన్ని ప్రాంతాలలో జరుపుకుంటారు. సైకత లింగం తో పార్వతి దేవిని పూజించే ఈ వ్రతాన్ని భక్తి శ్రద్దలతో ఆచరిస్తే కష్టాలు తొలగి , అష్టైశ్వర్యాలతో తులతూగుతారని నమ్మిక. వినాయక ఆవిర్భావం జరిగిన భాద్రపద శుద్ద చవితిన ఆది దేవుడైన గణపతి పూజ జరుపుకునే ఆనవాయితీ మనకు తెలిసిందే. అలాగే భాద్రపద శుద్ద పంచమినాడు ఋషి పంచమి జరుపుకొంటారు. ఇది కూడా మహిళలు జరుపుకునే వ్రతమే. ఈ వ్రతం చేసుకోవడం వలన పాపాలన్నీ తొలగి పుణ్య ఫలితం లభిస్తుంది అని భవిష్యపురాణం లో చెప్పబడిందని పండితులు చెపుతుంటారు. ఇదే రోజున బౌద్ద జయంతిని కూడా జరుపుకొంటారు. బౌద్ధ మతాన్ని ఆచరించే వారికి ఇదో పవిత్ర దినం.అలాగే సప్తమి కలసిన షష్ఠి సూర్యునికి అత్యంత ప్రీతిపాత్రమైన రోజు అలాంటి సూర్య షష్ఠి ఈ మాసం లో రానుంది. ఈరోజున సూర్యుడిని పూజిస్తే అశ్వమేధ యాగం చేసిన ఫలం దక్కుతుందని చెప్పబడింది. షష్ఠితో కూడిన సప్తమి ఉంటే కనుక సుబ్రహ్మణ్య స్వామిని కూడా పూజిస్తే సత్ఫలితాలు పొందవచ్చు. భాద్రపద శుద్ద అష్టమినాడు కేదారవ్రతాన్ని ఆచరిస్తుండగా భాద్రపద శుద్ద దశమినాడు దశావతార వ్రతం అదేవిధంగా ఏకాదశి రోజున పరివర్తన ఏకాదశి వ్రతాన్ని కొంతమంది జరుపుకుంటారు తొలి ఏకాదశి రోజున క్షీర సముద్రంలో శేషతల్పంపై శయనించిన శ్రీమహావిష్ణువు ఈ ఏకాదశి రోజున ప్రక్కకు పొర్లి పరివర్తనం చెందుతాడు , అందుకే దీన్ని పరివర్తన ఏకాదశి గా జరుపుకుంటారు. ద్వాదశి రోజున వామన జయంతి, చతుర్దశినాడు అనంత పద్మనాభ చతుర్దశి , పౌర్ణమి నాడు ఉమామహేశ్వర వ్రతం జరుపుకొంటారు. ఈ పౌర్ణమి నుంచి మహాలయపక్షం ఆరంభమవుతుంది,
అమావాస్య వరకు వుండే కాలాన్ని మహాలయ పక్షాలు అని లేకా పితృ క్షణాలు అని వ్యవహరిస్తుంటారు. పూర్వీకులకు తర్పణాలివ్వడం ఆచారం. ప్రతి ఏడాది తిధులు(తద్దినాలు) చేసే ఆచారం లేనివాళ్ళు తిధులతోను తేదీ లతోను సంభందం లేకుండా ఈ మహాలయ పక్షాలలో తమ పెద్దలకు తర్పణాలు ఇస్తే దోషాలు తొలగిపోతాయని పెద్దలు చెప్తుంటారు. భాద్రపద బహుళ తదియని ఉండ్రాళ్ళ తద్ధి గా జరుపుకుంటారు. ఇది కూడా స్త్రీలు చేసుకొనే పండుగే ముఖ్యంగా పెళ్లికాని యువతులు గౌరీ దేవిని పూజించి , ఉండ్రాళ్ళను నివేదిస్తే మంచి భర్త వస్తాడని అయిదవతనం వృద్ది చెందుతుందని చెప్తుంటారు
భాద్రపద కృష్ణ ఏకాదశి అజ ఏకాదశి దీన్ని ధర్మప్రభ ఏకాదశి అని కూడా అంటారు. ఈ భాద్రపదమాసం లో వచ్చే మరో విశిష్ట దినం కృష్ణ అమావాస్య దీనినే మహాలయమావాస్య అని అంటుంటారు. ఈ రోజున పితృ తర్పణాలు , దానధర్మాలు చేయడం ఆచారం గా వస్తుంది.. ఇన్ని విశేషాలు కలిగిన ఈ మాసం అందరికి శుభాలను కలుగజేయాలని ఆశిద్దాం.